3Jo | DOB | STEP |

YONI 'INA LETA 'ETONINA Yoni 'ina leta gete solanaya 'iemwasala bubuna palupaluna manuna.

3 John

Lokagutoki

1 'Abo'agu 'imu 'ena'i, ta leta gete ya'etoladinawa 'oyo gosiyagu Geyo 'emuya. Ona'ai'aila, 'ateguyega yaobobomemu.

2 Gosiyagu, ma igu sidasida Yaubada 'enaya ooyo 'ina miya bobo'ana manuna, manuna yamwalamwalatoni yaluyaluwayo 'ina miya bobo'ana, ta ma ina gwausowala.

3 Lowa 'aina tasidao bada simai ga 'imu bubuna palupaluna tetelina 'enega sigie gwausowaligu, manuna 'eda palupaluna 'enega 'utautauya.

4 Gete 'igu 'ebe gwausowala sinabwana, 'abo natugwao yanonodi 'aene 'eda palupaluna 'enega sitautauya.

'Ada tolemao be 'ada talauwalao manudi

5 Gosiyagu, 'imu lema be 'imu guinuwa 'owagao 'ediya tuta nina siapwesawa 'imu 'asaya manuna yagwausowala. 6 Ta tasidao nidi 'eguma siilama, 'imu lema 'ediya manuna sisimasimana toekalesiyao 'emaya. Ona'ai'aila, taudi Yaubada 'ina toguinuwao, 'enega 'ilobwenena be 'eguma sipilipili sinemi nima 'abiyadi wate wa'ebwa'edi. 7 Taudi Keliso 'ina guinuwa manuna sisakosakowasi, ta nigeya lema sida lobena taudi nigeya Yaubada 'ana toemisao 'ediyega. 8 'Enega 'ilobweneda be 'abo'ada talemedi, be 'enega ma'edao tada etopaisewa leleleya Yaubada manuna.

9 Ni'atu 'ami emataluwa ya'etoladinawa 'omi toekalesiyao, ta tai nina 'ana esana Diotilipi nuwanuwana be taunamo 'ida loiloina, 'enega 'igu loina 'i'etobodena, 10 ta 'ilo'aegilegu; ta wate gosedao 'ie'idi'idiyedi, be 'eguma 'aidi 'emiyega nuwanuwadi be silemedi 'i'eto'etobodedi, ta toekalesiyao nidi 'ipa'ipa'idi. 'Enega 'abo to tuta yaapwesawa, 'ina bubuna nidi manudi yada onaona.

11 Gosegwao, geya'abo bubuna to'umalina wamulimuliye, ta bubuna bobo'ana esi. Ona'ai'aila, tobobo'adi taudi Yaubada 'ina bodao, ta toto'umalidi nigeya Yaubada sida mwalatonina.

12 Ta Dimitilo sa'i tai bobo'ana. Tomota yauyaudi 'idi simana nadigega, manuna taudi e'ita 'ai'aila 'ana tomuliyao sisimana 'aene Dimitilo tai bobo'ana, ta 'abo'agu wate 'igu simana nadigega, be 'igu simana wamwalamwalatoni 'aene ona'ai'aila.

Ona 'ana 'ebe losalowa

13 Yage yaudi simiyami be nuwanuwagu manudi ya'etoladiwa, 14 ta tuwa, manuna yanuwayaina 'aene ma'etamo yawawai be 'oyo ma'iyagu tada 'awagwae.

15 Gosedao bada 'idi oboboma 'emuya. Ta gosedao nada maibo'adi wate 'ediya 'igu oboboma 'usimane. Kaiyoni.